Неделя мясопустная

Неделя мясопустная

На Утрени,

Бог Господь, на глас тропаря Осмогласника. Тропарь воскресный, и Богородичен, и обычное стихословие.

Чтем же и о нищелюбии слово Богослова, на три деления, егоже начало: Мужие братие, и соубозии: И полиелей. Степенны гласа. Прокимен, и Евангелие утреннее рядовое. псалом 50. Слава, глас 8: Покаяния отверзи ми двери: И ныне, Богородичен, Подобен: На спасения стези: Таже, глас 6: Помилуй мя Боже: Множества содеянных мною лютых:

И канон воскресен, и Богородицы на 6: и Триоди на 8.
Канон, творение господина Феодора Студита, глас 6.

Песнь 1.

Ирмос: Помощник и покровитель бысть мне во спасение, Сей мой Бог, и прославлю Его, Бог отца моего, и вознесу Его: славно бо прославися.

День страшный всенеизглаголаннаго Твоего пришествия страшуся помышляя: убоявся провижду, воньже предсядеши судити живыя и мертвыя, Боже мой Всесильне.

Егда приидеши Боже, во тьмах и тысящах ангельских, небесных начал, и мене окаяннаго, срести Тя Христе на облацех сподоби.

Гряди, приими душе моя, той час и день, егда Бог яве надстанет: и рыдай, плачи, обрестися чиста в час истязания.

Ужасает мя и страшит огнь негасимый геенский, червь горький, скрежет зубов: но ослаби ми, остави, и стоянию мя Христе, избранных Твоих соучини.

Возжеленнаго Твоего гласа, святыя Твоя зовущаго на радость, да услышу и аз окаянный, и обрящу Царствия Небеснаго неизреченное наслаждение.

Не вниди со мною в суд, носяй моя деяния, словеса изыскуяй, и исправляяй стремления: но щедротами Твоими презирая моя лютая, спаси мя Всесильне.

Слава, Троичен: Триипостасная Единице, начальнейшая Госпоже всех, совершенноначальное преначалие, Сама нас спаси, Отче и Сыне и Душе Пресвятый.

Богородичен: Кто роди Сына, несеянна Отчим законом? Сего убо раждает Отец без матере. Преславное чудо! Ты бо родила еси Чистая, Бога вкупе и Человека.

Катавасиа: Помощник и покровитель:

Песнь 3.

Ирмос: Утверди Господи, на камени заповедей Твоих подвигшееся сердце мое, яко един Свят еси, и Господь.

Господь грядет, и кто стерпит страх Его? кто явится лицу Его? Но готова буди, о душе, ко сретению.

Предварим, плачем, примиримся Богу прежде конца: страшно бо судище, на немже вси обнажени станем.

Помилуй Господи, помилуй мя, вопию Ти, егда приидеши со ангелы Твоими отдати всем по достоянию деяний.

Нестерпимый, Господи, гнев, како стерплю суда Твоего, преслушав Твое повеление? Но пощади, пощади мя в час суда.

Обратися, воздохни душе окаянная, прежде даже жития торжество конца не приимет, прежде даже двери чертога не затворит Господь.

Согреших, Господи, якоже иный никтоже от человек, прегрешив паче человека: прежде суда милостив буди ми, Человеколюбче.

Слава, Троичен: Троице простая, несозданная, безначальное Естество в Троице воспеваемое Ипостасей, спаси ны, верою покланяющияся державе Твоей.

Богородичен: Прозябла еси Пречистая безсеменным Рождеством живое Слово, воплощенное во утробе Твоей, непреложное: слава Богомати, Рождеству Твоему.

Катавасиа: Утверди Господи:

Седален, глас 6:

Помышляю день страшный, и плачуся деяний моих лукавых: како отвещаю безсмертному Царю? коим же дерзновением воззрю на Судию блудный аз? Благоутробный Отче, Сыне Единородный, Душе Святый, помилуй мя.

Слава: Во юдоли плача, в месте еже положил еси, егда сядеши Милостиве, сотворити праведный суд, не объяви моя тайная, ниже посрами мене пред ангелы: но пощади мя Боже и помилуй мя.

И ныне, Богородичен: Упование мира благая Богородице Дево, Твое и единое страшное предстательство молю: умилосердися на удобообстоятельныя люди, умоли милостиваго Бога, избавитися душам нашим от всякаго прещения, едина благословенная.

Песнь 4.

Ирмос: Услыша пророк:

Наста день, уже при дверех суд, душе бодрствуй, идеже царие вкупе и князи, богатии и убозии собираются и восприимет по достоянию содеянных от человек кийждо.

В чину своем, монах и иерарх, старый и юный, раб и владыка истяжется, вдовица и дева исправится: и всем горе тогда, не имевшим житие неповинное.

Неумытный суд Твой, неутаенное Твое судище хитрословия, не витий художество крадущее, не свидетелей непщевание отражающее праведное: в Тебе бо Бозе всех сокровенная предстоят.

Да не прииду в землю плача, да не вижду место тьмы Христе мой Слове, ниже связан буду рукама и ногама, вне чертога Твоего изверженный, одежду нетления оскверненную имеяй всеокаянный.

Внегда отлучиши грешныя от праведных, судяй миру, единаго от овец мя Твоих сопричти, от козлищ разлучая мя Человеколюбче, во еже услышати гласа онаго благословеннаго Твоего.

Испытанию бываему, и книгам отверзаемым содеянных, что сотвориши, о душе окаянная? Что отвещаеши на судищи, не имущая правды плоды принести Христу, и Содетелю твоему?

Слыша богатаго во пламени муки рыданословия, плачуся и рыдаю окаянный, тогожде сый осуждения, и молюся: помилуй мя Спасе мира, во время суда.

Слава, Троичен: Сына от Отца, и Духа славлю, яко от солнца свет и лучу: Оваго убо рождественне, зане и рождение, Оваго же происходне, зане и происхождение, собезначальную Божественную Троицу, покланяемую от всякия твари.

Богородичен: Девая Младенца родившая, и чистоту соблюдшая, Чистая Ты явилася еси Бога рождши и Человека, единаго Того во обою зраку: чудо Твое Дево Мати, ужасает всякий слух и помысл.

Катавасиа: Услыша пророк пришествие Твое Господи, и убояся, яко хощеши от Девы родитися, и человеком явитися, и глаголаше: услышах слух Твой, и убояхся, слава силе Твоей Господи.

Песнь 5.

Ирмос: От нощи утренююща:

Трепет неисповедимый, и страх тамо: приидет бо Господь, и дело с Ним коегождо от человек: и кто отсюду прочее себе не восплачет?

Река огненная смущает мя, истаявает мя, стружет мя скрежет зубов, тьма бездны: и како, или что содеяв, Бога умилостивлю?

Пощади, пощади Господи, раба Твоего, да не когда предаси мене горьким мучителем аггелом лютым: в нихже несть тамо покоя обрести.

Князь и вождь тамо вкупе, богатый и безславный, великий купно и малый исправится равно: горе комуждо прочее неуготовленному.

Ослаби, остави Господи, и прости елика Ти согреших, и не покажи мя тамо пред ангелы во осуждении огня, и студа некончаемаго.

Пощади, пощади Господи, создание Твое: согреших, ослаби ми, яко естеством чистый, Сам еси един, и иный разве Тебе никтоже есть вне скверны.

Слава, Троичен: Единицу естеством Тя Троице воспеваю, безначальную, непостижную, начальственное, царское, пресовершенное единство, Бога, и Света, и Живота, и Содетеля миру.

Богородичен: В Рождестве Твоем паче естества Чистая, закони естества Тебе разоришася яве: ибо без семене раждаеши Превечнаго Бога, от Отца рожденнаго.

Катавасиа: От нощи утренююща, Человеколюбче, просвети, молюся, и настави и мене на повеления Твоя, и научи мя Спасе, творити волю Твою.

Песнь 6.

Ирмос: Возопих всем сердцем:

Во страшнем Христе пришествии Твоем, егда явишися с Небесе, и поставятся престоли, и книги разгнутся: пощади, пощади тогда Спасе, создание Твое.

Тамо ничтоже помощи может, Богу сущу Судии, ни тщание, ни козни, ни слава, ни дружба: разве от дел крепость твоя, о душе моя!

Тамо вкупе князь и вождь, нищий и богатый, душе, ни отец возможет ни мати помогающи, ни избавляяй брат осуждения.

Страшное душе, истязание помышляющи Судиино, ужаснися отсюду, уготови слово, да не осудишися узами вечными.

Возми твое, да не услышу Господи, отсылаемь от Тебе, ниже, еже поиди во огнь проклятых: но возжеленнаго гласа праведных.

Адских врат избави мя Господи, пропасти, и тьмы несветимыя от преисподних, и огня негасимаго, и всякия иныя муки вечныя.

Слава, Троичен: Троичнаго единства Божество пою, Отца, и Сына, и Божественнаго Духа, единаго начала державу, соразделяемаго треми начертаньми.

Богородичен: Дверь Ты еси, Юже един пройде вшедый и изшедый, и ключи не разрешивый девства Чистая, Иисус создавый Адама, и Сын Твой.

Катавасиа: Возопих всем сердцем моим к щедрому Богу, и услыша мя от ада преисподняго, и возведе от тли живот мой.

Кондак, глас 1:

Егда приидеши Боже на землю со славою, и трепещут всяческая: река же огненная пред судищем влечет, книги разгибаются, и тайная являются: тогда избави мя от огня неугасимаго, и сподоби мя одесную Тебе стати Судие праведнейший.

Икос: Страшное судище Твое помышляя преблагий Господи, и день судный, ужасаюся, и боюся, от совести моея обличаемь, егда имаши сести на престоле Твоем, и творити испытание: тогда отрещися грехов никтоже возможет, истине обличающей, и боязни содержащей: вельми убо возшумит тогда огнь геенский, грешницы же возскрежещут. Темже мя помилуй прежде конца, и пощади мя Судие праведнейший.

Синаксарь.

Стихи: Егда судяй земли Судие всех сядеши,

Приидите, онаго гласа, достойна и мене усуди.

В сий день втораго и неумытнаго пришествия Христова память творим, юже божественнейшии отцы по двою притчу положиша, яко да не кто во ону Божие человеколюбие уведав, леностно поживет глаголя: человеколюбив есть Бог, и егда греха отлучуся, готово имам все совершити. Сей страшный день зде учиниша, да смертию и чаянием будущих злых устрашивше, леностно живущия к добродетели возведут, не надеющияся к человеколюбному точию, но взирати яко и праведtн есть Судия и отдает комуждо по делом его. Инако же, и душам прешедшим, подобаше приити и Судии: образ же некий, и настоящий праздник: понеже убо конец всех праздников полагается ныне, якоже и он всех будет по нам конечный. Подобает бо смотрити, яко в будущую Неделю начало мира, и самое от рая падение положат Адамово: настоящий же всех дней конец, и миру самому. В мясопусте же сию положиша, сокращающе, мню, пищу и объядение страха ради праздника, и к милости ближняго нас созывающе. И инако: понеже питавшеся изгнахомся из Едема, и под судом быхом и клятвою: посему настоящий положиша праздник, и яко хощем {имамы} в другую Неделю Адамом, по образу Едемскому изгнатися, дондеже Христос пришед паки нас возведет к раю. Второе же пришествие речеся, зане и первее плотию к нам прииде, но тих и без славы: ныне же с преестественными чудесы приидет, и с явленною светлостию с Небес и с телом, яко да познан будет всеми: яко Сей есть Иже и первее пришедый, и род человечь избавивый, и судити паки хотяй Сам, аще добре данная Ему соблюде. Когда убо будет сие пришествие? никтоже весть: сие бо и Господь апостолом скры. Тогда убо знамения некая яви предварити, яже нецыи от святых пространнее изъясниша. Глаголется же, яко по седмих тысящах лет пришествие Его будет. Прежде же Его пришествия приидет антихрист, и родится, яко глаголет святый Ипполит Римский, от жены скверны, и девицы мнимыя, от еврей же сущи от племене Данова, иже бяше отрок Иаковль: и ходити убо имать по Христу проходя жительство, и чудеса совершит, елика убо и Христос действова, и мертвыя воскресит. Обаче по мечтанию вся содеет: и рождение, и плоть, и прочая вся, якоже глаголет апостол. {2 Сол. зач. 275.} И тогда, глаголя, открыется сын пагубы, во всякой силе и знамениих и чудесех ложных: обаче не сам диавол в плоть претворится, якоже из Дамаска глаголет Иоанн: но человек от блуда родився, все сатанино действие приимет, и внезапу востанет: таже благ и кроток всем явится. И глад тогда велий будет: угодит людем, и Божественная писания пройдет, и посту навыкнет: и понудится от человек, и царь проповестся: и возлюбит множае еврейский род, и во Иерусалим достигнет, и храм их воздвигнет. Прежде же седмих лет, якоже глаголет Даниил, приидет Енох и Илиа, проповедающе людем не приимати его: сей же емь их умучит, таже и главы их отсечет. Благочествовати же изволившии далече отбегнут, ихже в горах обрет, демонми искусит: умалятся же седмь лет оная избранных ради, и глад будет велик, стихиам всем превращаемым, яко потребитися вмале уже всем. По сих же внезапу яко молния с небес Господние пришествие будет, предыдущу честному Его Кресту: и огненная река клокощущи Ему предыдет, всю землю от скверны очищающи. Ят же будет абие и антихрист, и его слуги, и предадятся вечному огню. Вострубившим же ангелом, приидет внезапу от конец земли, и от всех стихий, всяк человеческий род во Иерусалим, яко среда мира той: и тамо седоша престоли на суде: обаче с своими телесы и душами, всем к нетлению престихиованным, и един имущим зрак: и тем же стихиам на лучшее приемшим изменение. И разлучит единем словом Господь праведныя от грешных. И пойдут благих делатели, вечный живот приемлюще: грешнии же в вечную паки муку, и никогдаже сих престание будет. Ведомо же, яко не поста тогда взыщет, и наготы, и чудес, Христос, добра бо и сия: но множицею сих лучшая, милостыню яве и простыню {сострадание}. Речет бо праведным и грешным шесть неких заповедей: взалках бо, и дасте Ми ясти. Возжадах, и напоисте Мя. Странен бех, и введосте Мя. Наг, и одеясте Мя. Болен бех, и посетисте Мя. В темнице бех, и приидосте ко Мне. Елико бо сотвористе единому сих меньших, Мне сотвористе: яже может всяк кто сотворити по силе. Тогда убо всяк {Филип. зач 240} кто исповесть, яко Господь Иисус Христос, во славу Бога Отца. Муки убо, яже священное Евангелие предаде, сия суть: {Матф. зач 105} тамо будет плачь, и скрежет зубов: червь их не скончается, и огнь их не угаснет, и {Марк. зач 42} вложите его во тьму кромешную. Яже убо вся светло Церковь Божия приемши непщует, пищи {сладости} убо и Царствию Небесному быти, с Богом святых спребыванию, будущему оным сиянию всегдашнему и восхождению. Мучению же и тьме, и сицевым от Бога удалению и душам совестию иждивению, како леностию и пищею временною Божественнаго сияния лишишася. Неизреченным человеколюбием Твоим Христе Боже, желательнаго Твоего гласа нас сподоби, и сущим одесную Тебе сопричти, и помилуй нас, аминь.

Песнь 7.

Ирмос: Согрешихом, беззаконновахом:

Припадем и восплачемся прежде суда онаго вернии, егда небеса погибнут, звезды спадут, и вся земля поколеблется, да милостива обрящем в конец отцев Бога.

Неумытное истязание, страшный есть тамо суд, идеже Судия неутаен есть, идеже лица несть в дарех прияти: тогда пощади мя Владыко, и избави всякаго гнева Твоего страшнаго.

Господь грядет судити, кто стерпит видение Его? Вострепещи душе окаянная, вострепещи, и уготови исходищу дела твоя, да милостива и милосерда обрящеши Его, отцев Бога благословенна.

Негасимый огнь смущает мя, горчайший червей скрежет, ад душетленный страшит мя, благоумилен отнюд не бываю. Но Господи Господи, прежде конца утверди мя страхом Твоим.

Припадаю Ти, и приношу Тебе якоже слезы глаголы моя: согреших, якоже не согреши блудница, и беззаконновах, яко иный никтоже на земли. но ущедри Владыко, творение Твое, и призови мя.

Обратися душе, покайся, открый сокровенная, глаголи Богу вся ведущему: Ты веси моя тайная едине Спасе, но Сам мя помилуй, якоже поет Давид, по милости Твоей.

Слава, Троичен: Три, едино Существом, и едино Лицами, Три пою Сия: Отец, Сын, и Святый Дух, едина сила, хотение и действо. Един Бог Трисвятый, Царство едино единоначальнейшее.

Богородичен: Проходит краснейший от чертога чрева Твоего Бог, якоже Царь одеянный боготканною багряницею, обагрения тайнаго пречистых кровей Твоих, Безневестная, и царствует землею.

Катавасиа: Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам: но не предаждь нас до конца, отцев Боже.

Песнь 8.

Ирмос: Егоже воинства небесная:

Страшнаго втораго Твоего, Господи, пришествия помышляя сретение, трепещу прещения Твоего, боюся гнева Твоего: от сего мя часа зову, спаси во веки.

Тебе Богу судящу всяческая, кто стерпит земнороден, сый страстен? Негасимый бо огнь тогда, и червь скрежещущий вельми, осужденныя приимет во веки.

Всякое дыхание егда призовеши, еже разсудити Христе вкупе: великий страх тогда, велия нужда, токмо помогающим деянием во веки.

Всех Судие Боже мой и Господи, да услышу тогда гласа Твоего вожделеннаго, да увижду свет Твой великий, да узрю вселения Твоя, да узрю славу Твою, радуяся во веки.

Правосуде Спасе помилуй, и избави мя огня и прещения, егоже мне на суде праведно подъяти: ослаби ми прежде конца, добродетелию и покаянием.

Егда сядеши Судие, яко благоутробен, и покажеши страшную славу Твою Христе: о кий страх тогда, пещи горящей, и всем боящимся нестерпимаго судища Твоего!

Благословим Отца и Сына, и Святаго Духа, Господа.

Единаго Бога по Существу чту, Три Ипостаси пою определительне, иныя, но не инаковыя: понеже Божество едино в триех Лицех: ибо Отец, и Сын, и Божественный Дух.

Богородичен: Из светлейшаго чрева Твоего прошед, яко Жених из чертога возсия Христос, Свет велий сущим во тьме: ибо правды Солнце облистав, просвети Чистая мир.

Хвалим, благословим, покланяемся Господеви, поюще, и превозносяще во вся веки.

Ирмос: Егоже воинства небесная славят, и трепещут херувими и серафими, всяко дыхание и тварь, пойте, благословите и превозносите во вся веки.

Песнь 9.

Ирмос: Безсеменнаго зачатия:

Господь грядет грешныя мучити, праведныя же спасти: восплачемся, и возрыдаим, и приимем чувство онаго дне, воньже безвестная и тайная открыв, человеком отдаст по достоянию.

Пристрашен и трепетен бысть Моисей, видя Тя от задних: како же постою, лице Твое видя тогда аз окаянный, егда приидеши с Небесе? Но пощади мя Щедре, милостивным Твоим призреннем.

Даниил убояся часа истязания, аз же окаянный что постражду от него, грядый Господи, страшнаго дне, но даждь ми прежде конца благоугодно Тебе послужити, и улучити Царствие Твое.

Огнь готовится, червь устрояется: веселие, слава, ослабление, свет невечерний, радость праведных: и кто блаженный избегнути не восхощет мучения первых, наследивый вторая?

Да мя не отвратит от лица Твоего Господи ярость Твоего гнева: ниже да услышу гласа клятвеннаго, во огнь отсылающаго, но да вниду в радость нетленнаго Твоего чертога и аз тогда со святыми Твоими.

Ум уязвися, тело острупися, болезнует дух, слово изнеможе, житие умертвися, конец при дверех. Темже окаянная моя душе, что сотвориши, егда приидет Судия испытати твоя?

Слава, Троичен: Единаго Единородителю, единороднаго Сына Отче, и едине единаго Свете, Света сияние: и единый едине единаго Бога, Святый Душе, Господа Господь, воистинну сый. О Троице Единице Святая! Спаси мя богословяща Тя.

Богородичен: Чудо Рождества Твоего удивляет мя Всенепорочная, како зачинаеши безсеменно необыменнаго: рцы, како девствуеши рождши яко Мати? Еже паче естества верою прием, Рожденному поклонися: елика хощет бо, и может.

Катавасиа: Безсеменнаго зачатия Рождество несказанное, Матере безмужныя нетленен Плод: Божие бо рождение обновляет естества. Темже Тя вси роди, яко богоневестную Матерь, православно величаем.

Ексапостиларий: Таже настоящий.
Подобен: Со ученики взыдем:

Страшный день суда, и неизреченныя Твоея славы, помышляя трепещу Господи всяко, и трясыйся страхом вопию: на землю егда приидеши судити Христе Боже всяческая со славою, от всякаго избави мя мучения, одесную Тебе Владыко сподобивый мя стати.

Другий: Подобен: Жены услышите:

Се день грядет Господа Вседержителя, и кто стерпит страх пришествия онаго? День бо ярости есть, и пещь горящая, воньже Судия сядет, и по достоянию деяний комужде отдаяй.

Богородичен: Час испытания, и страшнаго пришествия Человеколюбца Владыки помышляя, весь трепещу, и сетуя, вопию Ти: Судие мой праведнейший, и едине Многомилостиве, кающася приими мя Богородицы молитвами.

На хвалитех стихиры воскресны Осмогласника 4: и анатолиев един: и Триоди 4, глас 6. Самогласны.

Стих: Всякое дыхание:

Помышляю день оный и час, егда имамы вси нази и яко осуждени, неумытному Судии предстати, тогда труба возшумит вельми, и основания земли подвижатся, и мертвии от гробов воскреснут, и возрастом единем вси будут, и всех тайная явленна предстанут пред Тобою и возрыдают, и восплачутся, и во огнь кромешный отыдут, иже никогдаже покаяшася: и в радость и веселие, праведных жребий внидет в чертог Небесный.

Стих: Исповемся Тебе Господи всем сердцем моим:

О каковый час тогда, и день страшный, егда сядет Судия на престоле страшном! Книги разгибаются, и деяния обличаются, и тайная тьмы явлена бывают, ангели обтекают, собирающе вся языки. Приидите, услышите царие и князи, раби и свободни, грешницы и праведницы, богатии и нищии: яко грядет Судия, хотяй судити всей вселенней. И кто претерпит пред лицем Его, егда ангели предстанут обличающе деяния, помышления, и мысли, яже в нощи и во дни? О каковый час тогда! Но прежде даже не приспеет кончина, потщися зовущи душе: Боже, обратив спаси мя, яко един благоутробен.

Глас 8: Стих: Возвеселюся и возрадуюся о Тебе:

Даниил пророк, муж желаний быв, властительное Божие видев, сице вопияше: Судия седе, и книги разгнушася. Блюди душе моя, постиши ли ся? Ближняго твоего не презри. От брашен воздержиши ли ся? Брата твоего не осуждай: да не во огнь отсылаема сгориши яко воск, но да без поткновения введет тя Христос в Царствие Свое.

Глас 1. Стих: Воскресни Господи Боже мой, да вознесется рука Твоя:

Предочистим себе братие, царицею добродетелей: се бо прииде, богатство нам благих подающи: страстей утоляет дмения, и Владыце примиряет прегрешившия. Темже с веселием сию приимем, вопиюще Христу Богу: воскресый из мертвых, неосуждены нас сохрани, славословящия Тя единаго Безгрешнаго.

Слава: паки тойже стих.

И ныне: Преблагословенна еси:

Славословие великое: и отпуст. Таже, обычная литиа в притворе, в нейже поем: Слава, и ныне, стихиру евангельскую. Присовокупляем и час 1-й, в немже чтется оглашение преподобнаго отца нашего Феодора Студита.