 |
||
Великая Суббота | ||
| ||||||
|
Суббота Великой седмицы
Во святую и Великую Субботу
клеплет ко Утрени в седмый час нощи. Начинаем Утреню по обычаю. И по шестопсалмии ектениа великая.
На Бог Господь: тропарь, глас 2:
Благообразный Иосиф с древа снем Пречистое Тело Твое, плащаницею чистою обвив и благоуханьми, во гробе нове покрыв положи.
Слава: Егда снизшел еси к смерти, Животе безсмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.
И ныне: Мироносицам женам, при гробе представ, Ангел вопияше: мира мертвым суть прилична, Христос же истления явися чуждь.
И, кадящу священнику весь храм, начинаем пети Непорочны со сладкопением: такожде по коемуждо стисе и похвалы.
Статия первая.
Возглашает певец, во глас 5:
Благословен еси, Господи, научи мя оправданием Твоим.
1. Блажени непорочнии в путь, ходящии в законе Господни.
И похвалы, во глас 5:
Жизнь во гробе положился еси, Христе, и Ангельская воинства ужасахуся, снизхождение славяще Твое.
2. Блажени испытающии свидения Его, всем сердцем взыщут Его.
Жизнь, како умираеши? Како и во гробе обитаеши, смерти же царство разрушаеши и от ада мертвыя возставляеши?
3. Не делающии бо беззакония в путех Его ходиша.
Величаем Тя, Иисусе Царю, и чтим погребение и страдания Твоя, имиже спасл еси нас от истления.
4. Ты заповедал еси заповеди Твоя сохранити зело.
Меры земли положивый, в мале гробе обитаеши днесь, Иисусе Всецарю, от гробов мертвыя возставляяй.
5. Дабы исправилися путие мои сохранити оправдания Твоя.
Иисусе, Христе мой, Царю всех, что ища к сущим во аде пришел еси? Или род свободити человеческий?
6. Тогда не постыжуся, внегда призрети ми на вся заповеди Твоя.
Владыка всех зрится мертв, и во гробе нове полагается истощивый гробы мертвых.
7. Исповемся Тебе в правости сердца, внегда научити ми ся судьбам правды Твоея.
Жизнь во гробе положен был еси, Христе, и смертию Твоею смерть погубил еси, и источил еси мирови жизнь.
8. Оправдания Твоя сохраню, не остави мене до зела.
Со злодеи яко злодей, Христе, вменен был еси, оправдал нас всех от злодейства древняго запинателя.
9. В чесом исправит юнейший путь свой? Внегда сохранити словеса Твоя.
Красный добротою паче всех человек, яко беззрачен мертв является, естество украсивый всех.
10. Всем сердцем моим взысках Тебе, не отрини мене от заповедей Твоих.
Ад како стерпит, Спасе, пришествие Твое, а не паче сокрушится омрачаемь, блистания света Твоего лучами ослеплен?
11. В сердце моем скрых словеса Твоя, яко да не согрешу Тебе.
Иисусе, сладкий мой и спасительный Свете, како во гробе темнем скрылся еси? О несказаннаго и неизреченнаго терпения!
12. Благословен еси, Господи, научи мя оправданием Твоим.
Недоумевает и естество умное, и множество безплотное, Христе, о таинстве несказаннаго и неизреченнаго Твоего погребения.
13. Устнама моима возвестих вся судьбы уст Твоих.
О чудес странных! О вещей новых! Дыхания моего Податель бездыханен носится, погребаемь руками Иосифовыма.
14. На пути свидений Твоих насладихся, яко о всяком богатстве.
И во гроб зашел еси, Христе, и недр Отеческих никакоже отлучился еси: сие есть и странно и преславно вкупе.
15. В заповедех Твоих поглумлюся и уразумею пути Твоя.
Истинный небесе и земли Царь, аще и во гробе малейшем заключен был еси, познался еси всей твари, Иисусе.
16. Во оправданиих Твоих поучуся, не забуду словес Твоих.
Тебе положену во гробе, Создателю Христе, адова основания подвигошася, и гроби человеков отверзошася.
17. Воздаждь рабу Твоему, живи мя, и сохраню словеса Твоя.
Землю содержай горстию, умерщвлен плотию, под землею ныне заключается, мертвыя избавляя от адова заключения.
18. Открый очи мои, и уразумею чудеса от закона Твоего.
Из истления возшел еси, Жизнь, Спасе мой, умерый и к мертвым пришедый, и сломивый адовы заклепы.
19. Пришлец аз семь на земли, не скрый от мене заповеди Твоя.
Якоже света светильник, ныне плоть Божия под землю яко под спуд крыется и отгоняет сущую во аде тьму.
20. Возлюби, душа моя, возжелати судьбы Твоя на всякое время.
Невещественных воинств множество стекается со Иосифом и Никодимом погребсти во гробе мале Тя, Невместимаго.
21. Запретил еси гордым, прокляти уклоняющиися от заповедей Твоих.
Умерщвлен волею и положен под землею, жизни источниче, Иисусе мой, оживил еси мя умерщвлена преступлением горьким.
22. Отыми от мене поношение и уничижение, яко свидений Твоих взысках.
Изменяшеся вся тварь страстию Твоею: вся бо Тебе, Слове, сострадаху, ведуща Тя Содержителя всех.
23. Ибо седоша князи и на мя клеветаху: раб же Твой глумляшеся во оправданиих Твоих.
Жизни камень во чрево прием, ад всеядец изверже мертвыя, яже от века поглоти.
24. Ибо свидения Твоя поучение мое есть, и совети мои оправдания Твоя.
Во гробе нове положился еси, Христе, и естество человеческое обновил еси, воскрес боголепно из мертвых.
25. Прильпе земли душа моя: живи мя по словеси Твоему.
На землю сшел еси, да спасеши Адама: и на земли не обрет сего, Владыко, даже до ада снизшел еси ища.
26. Пути моя возвестих, и услышал мя еси, научи мя оправданием Твоим.
Сотрясается страхом, Слове, вся земля, и носило света лучи скры, величайшему Твоему Свету сокровену бывшу в земли.
27. Путь оправданий Твоих вразуми ми, и поглумлюся в чудесех Твоих.
Яко человек убо умираеши волею, Спасе, яко Бог же смертныя возставил еси от гробов и глубины греховныя.
28. Воздрема душа моя от уныния: утверди мя в словесех Твоих.
Слезоточная рыдания на Тебе матерски, о Иисусе, накрапляющи, Чистая вопияше: како погребу Тя, Сыне?
29. Путь неправды отстави от мене и законом Твоим помилуй мя.
Якоже пшеничное зерно, зашед в недра земная, изобильный воздал еси клас, возставив человеки, сущия от Адама.
30. Путь истины изволих и судьбы Твоя не забых.
Под землю скрылся еси, якоже солнце ныне, и нощию смерти покровен был еси: но возсияй светлейше, Спасе.
31. Прилепихся свидением Твоим, Господи, не посрами мене.
Якоже солнечный круг луна сокрывает, и Тебе, Спасе, ныне гроб скры, скончавшагося смертию плотски.
32. Путь заповедей Твоих текох, егда разширил еси сердце мое.
Жизнь смерти вкусившая, Христос от смерти смертныя свободи и всем ныне дарует жизнь.
33. Законоположи мне, Господи, путь оправданий Твоих и взыщу и выну.
Умерщвлена древле завистно Адама возводиши к жизни умерщвлением Твоим, Спасе, во плоти явився Новый Адам.
34. Вразуми мя, и испытаю закон Твой, и сохраню и всем сердцем моим.
Невещественнии чини, простерта мертва Тя зряще нас ради, ужасахуся, покрывающеся крилы, Спасе.
35. Настави мя на стезю заповедей Твоих, яко тую восхотех.
Снем Тя, Слове, от древа мертва, во гробе Иосиф ныне положи: но востани, спасая вся, яко Бог.
36. Приклони сердце мое во свидения Твоя, а не в лихоимство.
Ангелом радость быв, Спасе, ныне и печали сим был еси виновен, видимь плотию бездыханен мертв.
37. Отврати очи мои, еже не видети суеты: в пути Твоем живи мя.
Вознесен на древо, и живущия человеки совозносиши: под землею же быв, лежащия под нею воскрешаеши.
38. Постави рабу Твоему слово Твое в страх Твой.
Якоже лев уснув плотию, Спасе, яко некий скимен млад возстаеши, отложив старость плотскую.
39. Отыми поношение мое, еже непщевах: яко судьбы Твоя благи.
В ребра прободен был еси, ребро вземый Адамле, от негоже Еву создал еси, и источил еси токи чистительныя.
40. Се возжелах заповеди Твоя: в правде Твоей живи мя.
Тайно убо древле закалается агнец: Ты же, яве заклан быв, Незлобиве, всю тварь очистил еси, Спасе.
41. И да приидет на мя милость твоя, Господи, спасение Твое по словеси Твоему.
Кто изречет образ страшный воистинну новый? Владычествуяй бо тварию днесь страсть приемлет и умирает нас ради.
42. И отвещаю поношающим ми слово, яко уповах на словеса Твоя.
Жизни Хранитель како зрится мертв? Ужасающеся Ангели взываху: како же во гробе заключается Бог?
43. И не отыми от уст моих словесе истинна до зела: яко на судьбы Твоя уповах.
Из ребра Твоего, копием прободеннаго, Спасе, жизнь искапаеши жизни (Еве), от жизни изгнавшей мя, живиши мя с нею.
44. И сохраню закон Твой выну, в век и в век века.
Распростерт на древе, собрал еси человеки: в ребра же Твоя животочная прободен, всем оставление источаеши, Иисусе.
45. И хождах в широте, яко заповеди Твоя взысках.
Благообразный, Спасе, образует страшно и погребает Тя яко мертва благообразно, и ужасается Твоего образа страшнаго.
46. И глаголах о свидениих Твоих пред цари и не стыдяхся.
Под землю хотением низшед яко смертен, возводиши от земли к небесным оттуду низпадшия, Иисусе.
47. И поучахся в заповедех Твоих, яже возлюбих зело.
Аще и мертв виден был еси, но живый яко Бог, возводиши от земли к небесным оттуду низпадшия, Иисусе.
48. И воздвигох руце мои к заповедем Твоим, яже возлюбих.
Аще и мертв виден был еси, но, живый яко Бог, умерщвленныя человеки оживил еси, моего умертвив умертвителя.
И глумляхся во оправданиих Твоих.
О радости оныя! О многия сладости! Еяже сущих во аде наполнил еси, во глубинах мрачных Свет возсияв.
49. Помяни словеса Твоя рабу Твоему, ихже упование дал ми еси.
Покланяюся страсти, воспеваю погребение, величаю Твою державу, Человеколюбче, имиже свободихся от страстей тлетворных.
50. То мя утеши во смирении моем, яко слово Твое живи мя.
На Тя меч обнажашеся, Христе: и меч крепкаго убо притупляется, меч же едемский обращается.
51. Гордии законопреступоваху до зела: от закона же Твоего не уклонихся.
Агница, зрящи Агнца в заколении острием прободаема, рыдаше, сподвизающи и стадо вопити.
52. Помянух судьбы Твоя от века, Господи, и утешихся.
Аще и во гробе погребаешися, аще и во ад идеши, Спасе, но и гробы истощил еси, и ад обнажил еси, Христе.
53. Печаль прият мя от грешник, оставляющих закон Твой.
Волею низшед под землю, Спасе, умерщвленныя человеки оживил еси и возвел еси во славе Отчей.
54. Пета бяху мне оправдания Твоя на месте пришельствия моего.
От Троицы Един поносительную смерть во плоти нас ради претерпе: ужасается солнце, и трепещет земля.
55. Помянух в нощи имя Твое, Господи, и сохраних закон Твой.
Яко от источника горькаго, от Иудова колена исчадия в рове положиша Питателя маннодавца Иисуса.
56. Сей бысть мне, яко оправданий Твоих взысках.
Судия яко судимь пред Пилатом судиею и предста, и на смерть неправедную на древе крестнем осужден бысть.
57. Часть моя еси, Господи, рех сохранити закон Твой.
Гордый Израилю, убийственнии людие! Что пострадавше, Варавву свободисте, Спаса же предасте кресту?
58. Помолихся Лицу Твоему всем сердцем моим: помилуй мя по словеси Твоему.
Рукою Твоею создавый Адама от земли, того ради естеством был еси Человек, и распялся еси волею Твоею.
59. Помыслих пути Твоя и возвратих нозе мои во свидения Твоя.
Послушав, Слове, Отца Твоего, даже до ада лютаго сошел еси и воскресил еси род человеческий.
60. Уготовихся и не смутихся, сохранити заповеди Твоя.
Увы Мне, Свете мира! Увы Мне, свете Мой, Иисусе Мой возжеленный! Вопияше Дева, рыдающи горько.
61. Ужа грешник обязашеся мне, и закона Твоего не забых.
Завистливии, убийственнии и гордии людие! Поне плащаницы и сударя самаго постыдитеся, воскресшу Христу.
62. Полунощи востах исповедатися Тебе о судьбах правды Твоея.
Прииди убо, скверный убийце учениче, и нрав злобы твоея покажи ми, имже был еси предатель Христов.
63. Причастник аз есмь всем боящимся Тебе и хранящим заповеди Твоя.
Яко человеколюбив некто притворяешися, буе и слепе, всегубительнейше, неверне, Миро продавый на цене.
64. Милости Твоя, Господи, исполнь земля: оправданием Твоим научи мя.
Небеснаго Мира кую цену стяжал еси? За Многоценнаго что приял еси равноценное? Неистовство обрел еси, проклятейший сатано.
65. Благость сотворил еси с рабом Твоим, Господи, по словеси Твоему.
Аще нищелюбец еси и о мире печалуеши, истощаемем во очищение души, како за злато продаеши Светозарнаго?
66. Благости и наказанию и разуму научи мя, яко заповедем Твоим веровах.
О Боже и Слове! О радость Моя! Како претерплю тридневное Твое погребение? Ныне терзаюся утробою матерски.
67. Прежде даже не смирити ми ся, аз прегреших: сего ради слово Твое сохраних.
Кто даст Ми воду и слез источники, да оплачу сладкаго Моего Иисуса? Богоневестная Дева взываше.
68. Благ еси Ты, Господи, и благостию Твоею научи мя оправданием Твоим.
О горы и холми, и человеков множества, восплачитеся, и вся рыдайте со Мною, Бога нашего Материю!
69. Умножися на мя неправда гордых, аз же всем сердцем моим испытаю заповеди Твоя.
Когда увижу Тя, Спасе, безлетнаго Света, радость и сладость сердца Моего? Дева горько вопияше.
70. Усырися, яко млеко, сердце их, аз же закону Твоему поучихся.
Аще и яко камень краесекомый, Спасе, Ты приял еси сечение, но источил еси живую струю, яко Источник сый жизни.
71. Благо мне, яко смирил мя еси, яко да научуся оправданием Твоим.
Яко от источника единаго, от ребра Твоего, сугубую реку изливающаго, напаяеми, безсмертную приобретаем жизнь.
72. Благ мне закон уст Твоих, паче тысящ злата и сребра.
Волею явился еси, Слове, во гробе мертв: но живеши, и человеки Воскресением Твоим, Спасе мой, воздвигнеши, якоже предрекл еси.
Слава: Воспеваем, Слове, Тебе всех Бога со Отцем и Святым Твоим Духом, и славим Божественное Твое погребение.
И ныне, Богородичен: Ублажаем Тя, Богородице Чистая, и почитаем тридневное погребение Сына Твоего и Бога нашего верно.
И паки первый припев оба лика вкупе. Таже ектениа малая. И возглас на первую статию:
Яко благословися Твое имя, и прославися Твое Царство, Отца, и Сына, и Святаго Духа, ныне и присно, и во веки веков.
И, покадившу священнику, начинаем вторую статию.
Статия вторая.
Начинает левый лик благочинно тропарь, во глас 5:
Достойно есть величати Тя, Жизнодавца, на Кресте руце простершаго и сокрушившаго державу вражию.
73. Руце Твои сотвористе мя и создасте мя: вразуми мя, и научуся заповедем Твоим.
Достойно есть величати Тя, всех Зиждителя: Твоими бо страданьми имамы безстрастие, избавльшеся от тления.
74. Боящиися Тебе узрят мя и возвеселятся, яко на словеса Твоя уповах.
Ужасеся земля, Спасе, и солнце скрыся, Тебе, Невечернему Свету, Христе, зашедшу во гробе плотски.
75. Разумех, Господи, яко правда судьбы Твоя, и воистинну смирил мя еси.
Уснул еси, Христе, жизноподательным сном во гробе и от тяжкаго сна греховнаго воздвигл еси род человеческий.
76. Буди же милость Твоя, да утешит мя, по словеси Твоему рабу Твоему.
Едина от жен без болезней родих Тя, Чадо, ныне же терплю Страстию Твоею болезни нестерпимыя: глаголаше Чистая.
77. Да приидут мне щедроты Твоя, и жив буду, яко закон Твой поучение мое есть.
Горе Тя, Спасе, неразлучно со Отцем суща, долу же мертва простерта на земли зряще, ужасаются Серафими.
78. Да постыдятся гордии, яко неправедно беззаконноваша на мя: аз же* поглумлюся в заповедех Твоих. (* размышляти буду о заповедех Твоих.)
Раздирается церковная завеса Твоим распятием, Слове: сокрывают светила свет, Тебе, Солнцу, скрывшуся под землю.
79. Да обратят мя боящиися Тебе и ведящии свидения Твоя.
Земли круг изначала единем манием водрузивый бездыханен, яко человек зайде под землю: ужаснися видением, небо.
80. Буди сердце мое непорочно во оправданиих Твоих, яко да не постыжуся.
Зашел еси под землю, рукою Твоею создавый человека, да воздвигнеши от падения соборы человеческия всесильною державою.
81. Исчезает во спасение Твое душа моя, на словеса Твоя уповах.
Плач священный, приидите, воспоим Христу умершему, яко древле жены мироносицы, да и радуйся услышим с ними.
82. Исчезоша очи мои в слово Твое, глаголюще: когда утешиши мя?
Миро воистинну неистощимое еси Ты, Слове: темже Ти и миро приношаху, яко мертву Живому, жены мироносицы.
83. Зане бых яко мех на слане: оправданий Твоих не забых.
Погребен убо, Христе, адова царствия сокрушаеши, смертию же смерть умерщвляеши и от тления свобождаеши земнородныя.
84. Колика есть дней раба Твоего? Когда сотвориши ми от гонящих мя суд?
Токи жизни проливающая Божия Премудрость, во гроб зашедши, оживотворяет сущия в неприступных адовых местех.
85. Поведаша мне законопреступницы глумления, но не яко закон Твой, Господи.
Да обновлю человеческое сокрушенное естество, волею уязвлен есть смертию плотски: темже, Мати Моя, не терзайся рыданьми.
86. Вся заповеди Твоя истина: неправедно погнаша мя, помози ми.
Зашел еси под землю, Светило правды, и мертвыя якоже от сна воздвигл еси, отгнав всякую тьму, сущую во аде.
87. Вмале не скончаша мене на земли: аз же не оставих заповедей Твоих.
Зерно двоерасленное жизноподательное в недра земли сеется со слезами днесь: но, прозябнув, мир обрадует.
88. По милости Твоей живи мя: и сохраню свидения уст Твоих.
Убояся Адам Бога ходяща в раи, радуется же во ад сошедшу, падый прежде, и ныне воздвизаемь.
89. Во век, Господи, слово Твое пребывает на небеси.
Лиет Тебе возлияния слезная, плотию положену во гробе, Рождшая Тя, Христе, вопиющи: востани, Чадо, якоже предрекл еси.
90. В род и род истина Твоя: основал еси землю, и пребывает.
Во гробе нове благоговейно Тя сокрывая, Иосиф песни исходныя боголепныя, смешенныя с рыданьми, поет Тебе, Спасе.
91. Учинением Твоим пребывает день, яко всяческая работна Тебе.
Гвоздьми Тя ко Кресту пригвождена узревши, Мати Твоя, Слове, гвоздьми и стрелами печали горькия пронзается душею.
92. Яко аще бы не закон Твой поучение мое был, тогда убо погибл бых во смирении моем.
Зрящи Тя, всех сладость, питием напаяемаго горьким, Мати слезами лице орошает горце.
93. Во век не забуду оправданий Твоих, яко в них оживил мя еси.
Уязвляюся люте и терзаюся утробою, Слове, зрящи неправедное Твое заколение, глаголаше Пречистая с плачем.
94. Твой есмь аз, спаси мя, яко оправданий Твоих взысках.
Око сладкое и устне Твои како закрыю, Слове? Како же Тя аки мертвеца погребу? Ужасаяся , вопияше Иосиф.
95. Мене ждаша грешницы погубити мя: свидения Твоя разумех.
Песни надгробныя Иосиф и Никодим поют Христу умершему ныне: поют же с ними и Серафими.
96. Всякия кончины видех конец: широка заповедь Твоя зело.
Заходиши под землю, Спасе, Солнце правды: темже Рождшая Тя луна от печалей затмевается, вида Твоего лишаема.
97. Коль возлюбих закон Твой, Господи! Весь день поучение мое есть.
Ужасеся ад, Спасе, зря Тя, Жизнодавца, богатство онаго расхищающа и сущия от века мертвыя возставляюща.
98. Паче враг моих умудрил мя еси заповедию Твоею, яко в век моя есть.
Солнце свет возсиявает по нощи, Слове: и Ты, воскрес, просияй по смерти ясно, яко от чертога.
99. Паче всех учащих мя разумех, яко свидения Твоя поучение мое есть.
Земля Тя, Создателю, в недра приемши, трепетом содержима, Спасе, трясется, возбудивши мертвыя трясением.
100. Паче старец разумех, яко заповеди Твоя взысках.
Миром Тя, Христе, ныне новолепно помазавше, Никодим и Благообразный вопияху: ужаснися, вся земле!
101. От всякаго пути лукава возбраних ногам моим, яко да сохраню словеса Твоя.
Зашел еси, Светотворче, и с Тобою зайде свет солнца: трепетом же тварь содержится, Тя проповедающи всех Творца.
102. От судеб Твоих не уклонихся, яко Ты законоположил ми еси.
Камень углажденный покрывает краеугольный камень: человек же смертный, яко смертна, Бога сокрывает ныне во гробе. Ужаснися, земле!
103. Коль сладка гортани моему словеса Твоя! Паче меда устом моим.
Виждь ученика, егоже любил еси, и Твою Матерь, Чадо, и вещание даждь сладчайшее: взываше, плачущи, Чистая.
104. От заповедей Твоих разумех: сего ради возненавидех всяк путь неправды.
Ты, Слове, яко сый жизни Податель, на Кресте прострыйся, иудеев не умертвил еси, но воскресил еси и сих мертвыя.
105. Светильник ногама моима закон Твой и свет стезям моим.
Доброты прежде не имел еси, Слове, ниже вида, егда страдал еси: но воскрес превозсиял еси, украсив человеки Божественными зарями.
106. Кляхся и поставих сохранити судьбы правды Твоея.
Зашел еси плотию в землю, Невечерняя Деннице, и не терпя зрети солнце померче полудни сущу.
107. Смирихся до зела: Господи, живи мя по словеси Твоему.
Солнце и луна вкупе померкша, Спасе, рабом благоразумным подражаху, иже в черныя одежды облачаются.
108. Вольная уст моих благоволи же, Господи, и судьбам Твоим научи мя.
Позна Тя Бога сотник, аще и умертвился еси: како убо Тя, Боже мой, осяжу рукама? Ужасаяся, вопияше Иосиф.
109. Душа моя в руку Твоею выну, и закона Твоего не забых.
Усну Адам, но смерть из ребра изводит: Ты же, ныне уснув, Слове Божий, источаеши от ребр Твоих мирови жизнь.
110. Положиша грешницы сеть мне, и от заповедей Твоих не заблудих.
Уснул еси мало и оживил еси умершия, и, воскрес, воскресил еси спящия от века, Блаже.
111. Наследовах свидения Твоя во век, яко радование сердца моего суть.
Взят еси от земли, но источил еси спасения вино, животочная Лозо: прославляю Страсть и Крест.
112. Приклоних сердце мое сотворити оправдания Твоя в век за воздаяние.
Како невещественнии чиноначальницы, зряще Тя, Спасе, нага, окровавлена, осуждена, терпяху дерзость распинателей?
113. Законопреступныя возненавидех, закон же Твой возлюбих.
Лукавый, стропотнейший роде еврейский! Ведал еси воздвижение храма: почто осудил еси Христа?
114. Помощник мой и Заступник мой еси Ты: на словеса Твоя уповах.
Во одежду поругания Украсителя всех облекаеши, Иже небо озвезди и землю украси чудно.
115. Уклонитеся от мене, лукавнующии, и испытаю заповеди Бога моего.
Якоже птица неясыть, уязвлен в ребра Твоя, Слове, дети Твоя умершия оживил еси, искапав им животворныя токи.
116. Заступи мя по словеси Твоему и жив буду: и не посрами мене от чаяния моего.
Солнце древле устави Иисус, иноплеменники секий: Ты же скрылся еси, низлагая тьмы начальника.
117. Помози ми, и спасуся, и поучуся во оправданиих Твоих выну.
От недр Отеческих неисходен пребыв, Щедре, и Человек быти благоволил еси, и во ад снизшел еси, Христе.
118. Уничижил еси вся отступающия от оправданий Твоих: яко неправедно помышление их.
Вознесен бысть распныйся, землю на водах повесивый, и яко бездыханен в ней ныне возлегает: еже не терпящи трясашеся люто.
119. Преступающия непщевах вся грешныя земли: сего ради возлюбих свидения Твоя.
Увы мне, о Сыне! Неискусомужная, рыдающи, глаголаше: на Негоже бо яко на Царя надеяхся, осуждена зрю ныне на Кресте.
120. Пригвозди страху Твоему плоти моя: от судеб бо Твоих убояхся.
Сия Гавриил Мне возвести, егда слете, иже рече о Царстве вечном Сына Моего Иисуса.
121. Сотворих суд и правду: не предаждь мене обидящим мя.
Увы, Симеоново совершися пророчество: Твой бо меч пройде сердце Мое, Еммануиле.
122. Восприими раба Твоего во благо, да не оклеветают мене гордии.
Поне сущих от мертвых постыдитеся, о иудее! Ихже возстави Жизнодавец, Егоже вы убисте завистно.
123. Очи мои исчезосте во спасение Твое и в слово правды Твоея.
Ужасеся солнце, видев Тебе, невидимый Свете, Христе мой, во гробе сокрываема и бездыханна, и помрачи свой свет.
124. Сотвори с рабом Твоим по милости Твоей и оправданием Твоим научи мя.
Плакаше горько Пренепорочная Мати Твоя, Слове, егда во гробе виде Тебе, Неизреченнаго и Безначальнаго Бога.
125. Раб Твой есмь аз: вразуми мя, и увем свидения Твоя.
Мертвость Твою, Христе, зрящи, нетленная Мати Твоя горько к Тебе вещаше: не косни, Жизнь, в мертвых.
126. Время сотворити Господеви: разориша закон Твой.
Ад лютый вострепета, егда Тя виде, Солнце Славы, Безсмертне, и издаваше узники со тщанием.
127. Сего ради возлюбих заповеди Твоя паче злата и топазиа.
Велие и ужасное видение ныне зрится: жизни бо Виновник волею смерть подъят, оживити хотя всех.
128. Сего ради ко всем заповедем Твоим направляхся, всяк путь неправды возненавидех.
Прободаешися в ребра и пригвождаешися в руце Ты, Владыка, язву от ребра и невоздержание рук праотец исцеляя.
129. Дивна свидения Твоя: сего ради испыта я душа моя.
Прежде о Рахилине сыне плакася всяк в дому: ныне о Сыне Девы рыдаша ученик лик с Материю.
130. Явление словес Твоих просвещает и вразумляет младенцы.
Ударение рук даша по ланите Христу, рукою человека создавшему и зубы зверя сокрушившему.
131. Уста моя отверзох и привлекох дух, яко заповедей Твоих желах.
Песньми Твое, Христе, распятие и погребение ныне вси вернии празднуем, избавльшеся от смерти погребением Твоим.
Слава, Троичен: Безначальне Боже, Соприсносущне Слове и Душе Святый! Укрепи рог православных людей, яко Благ.
И ныне, Богородичен: Жизнь рождшая, Пренепорочная Чистая Дево, утоли церковныя соблазны и подаждь мир, яко Благая.
И паки первый тропарь оба лика. Таже ектениа малая.
Возглас: Яко Свят еси, Боже наш, на престоле славы Херувимстем почиваяй, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков.
И начинаем третью статию, кадящу священнику.
Статия третия.
Начинает паки со сладкопением десный, сиречь первый лик, на глас 3-й:
Роди вси песнь погребению Твоему приносят, Христе мой.
132. Призри на мя и помилуй мя, по суду любящих имя Твое.
Снем с древа, плащаницею обвив, Аримафей во гробе Тя погребает.
133. Стопы моя направи по словеси Твоему, и да не обладает мною всякое беззаконие.
Мироносицы приидоша, миро Тебе, Христе мой, носяща премудро.
134. Избави мя от клеветы человеческия, и сохраню заповеди Твоя.
Гряди, вся тварь, песни исходныя принесем Зиждителю.
135. Лице Твое просвети на раба Твоего, и научи мя оправданием Твоим.
Яко мертва Живаго с мироносицами вси миропомажем мудренно.
136. Исходища водная изведосте очи мои, понеже не сохраних закона Твоего.
Иосифе треблаженне, погреби тело Христа Жизнодавца.
137. Праведен еси, Господи, и прави суди Твои.
Ихже напита манною, тии подвигоша пяту на Благодетеля.
138. Заповедал еси правду свидения Твоя и истину зело.
Ихже напита манною, тии приносят Спасу желчь купно и оцет.
139. Истаяла мя есть ревность Твоя: яко забыша словеса Твоя врази мои.
О пребезумия и христоубийства пророкоубийц!
140. Разжженно слово Твое зело, и раб Твой возлюби е.
Якоже безумный служитель, предаде ученик бездну премудрости.
141. Юнейший аз есмь и уничижен: оправданий Твоих не забых.
Избавителя продав, пленник явися льстивый Иуда.
142. Правда Твоя правда во век, и закон Твой истина.
По Соломону, ров глубокий уста еврей беззаконных.
143. Скорби и нужды обретоша мя: заповеди Твоя поучение мое.
В стропотных шествиих еврей беззаконных волчцы и сети.
144. Правда свидения Твоя в век: вразуми мя, и жив буду.
Иосиф погребает с Никодимом, аки мертвеца, Зиждителя.
145. Воззвах всем сердцем моим: услыши мя, Господи: оправдания Твоя взыщу.
Жизнодавче Спасе, слава державе Твоей, ад разорившей.
146. Воззвах Ти: спаси мя, и сохраню свидения Твоя.
Лежаща Тя, Слове, видящи, Пречистая матерски плакаше.
147. Предварих в безгодии, и воззвах, на словеса Твоя уповах.
О сладкая Моя весно, Сладчайшее Мое Чадо! Где Твоя зайде доброта?
148. Предваристе очи мои ко утру, поучитися словесем Твоим.
Плач сподвизаше Всечистая Твоя Мати Тебе, Слове, умершу.
149. Глас мой услыши, Господи, по милости Твоей: по судьбе Твоей живи мя.
Жены с миром приидоша помазати Христа Божественнаго мира.
150. Приближишася гонящии мя беззаконием, от закона же Твоего удалишася.
Смерть смертию Ты умерщвляеши, Боже мой, Божественною силою Твоею.
151. Близ еси Ты, Господи, и вси путие Твои истина.
Прельстися прелестник, прельстивыйся же избавляется премудростию Твоею, Боже мой.
152. Исперва познах от свидений Твоих, яко в век основал я еси.
Во дно адово низведен бысть предатель, в кладенец истления.
153. Виждь смирение мое, и изми мя: яко закона Твоего не забых.
Волчцы и сети путие треокаяннаго безумнаго Иуды.
154. Суди суд мой, и избави мя: словесе ради Твоего живи мя.
Вси погибнут вкупе распинателие Твои, Слове, Сыне Божий Всецарю.
155. Далече от грешник спасение, яко оправданий Твоих не взыскаша.
В кладенце истления вси погибнут вкупе мужие кровей.
156. Щедроты Твоя многи, Господи: по судьбе Твоей живи мя.
Сыне Божий Всецарю, Боже мой, Создателю мой, како страсть подъял еси?
157. Мнози изгонящии мя и стужающии ми: от свидений Твоих не уклонихся.
Юница, Тельца на древе повешена зрящи, взываше.
158. Видех неразумевающия и истаях: яко словес Твоих не сохраниша.
Тело живоносное Иосиф погребает с Никодимом.
159. Виждь, яко заповеди Твоя возлюбих: Господи, по милости Твоей живи мя.
Взываше Отроковица, тепле слезы точащи, утробою прободаема.
160. Начало словес Твоих истина, и во век вся судьбы правды Твоея.
Свете очию Моею, Сладчайшее Мое Чадо! Како во гробе ныне сокрываешися?
161. Князи погнаша мя туне: и от словес Твоих убояся сердце мое.
Мати, не рыдай! Адама и Еву свободити, сия стражду.
162. Возрадуюся аз о словесех Твоих, яко обретаяй корысть многу.
Прославляю Твое, Сыне Мой, крайнее милосердие, егоже ради сия страждеши.
163. Неправду возненавидех и омерзих, закон же Твой возлюбих.
Оцтом напоен был еси и желчию, Щедре, разрушая древнее вкушение.
164. Седмерицею днем хвалих Тя о судьбах правды Твоея.
Ко древу пригвожден был еси, древле люди Твоя столпом облачным покрываяй.
165. Мир мног любящим закон Твой, и несть им соблазна.
Мироносицы, Спасе, ко гробу пришедша, миро приношаху Тебе.
166. Чаях спасения Твоего, Господи, и заповеди Твоя возлюбих.
Востани, Щедре, от пропастей адских возставляяй нас.
167. Сохрани душа моя свидения Твоя и возлюби я зело.
Воскресни, Жизнодавче! Рождшая Тя Мати, слезы точащи, глаголет.
168. Сохраних заповеди Твоя и свидения Твоя, яко вси путие мои пред Тобою, Господи.
Потщися воскреснути, Слове. Печаль разрешая чисто Рождшия Тя.
169. Да приближится моление мое пред Тя, Господи: по словеси Твоему вразуми мя.
Небесныя силы ужасошася страхом, мертва Тя зряща.
170. Да внидет прошение мое пред Тя, Господи: по словеси Твоему избави мя.
Любовию и страхом Страсти Твоя почитающим даждь прегрешений разрешение.
171. Отрыгнут устне мои пение, егда научиши мя оправданием Твоим.
О ужаснаго и страннаго видения, Божий Слове! Како земля Тя покрывает?
172. Провещает язык мой словеса Твоя, яко вся заповеди Твоя правда.
С Тобою древле, Спасе, Иосиф бегает: и ныне Тя иный (Иосиф) погребает.
173. Да будет рука Твоя еже спасти мя, яко заповеди Твоя изволих.
Плачет и рыдает Пречистая Мати Твоя, Спасе мой, о Тебе умершем.
174. Возжелах спасение Твое, Господи, и закон Твой поучение мое есть.
Ужасаются умы страннаго и ужаснаго Твоего, всех Создателю, погребения.
175. Жива будет душа моя и восхвалит Тя: и судьбы Твоя помогут мне.
Излияша на гроб мироносицы миро, зело рано пришедша.
176. Заблудих яко овча погибшее: взыщи раба Твоего, яко заповедей Твоих не забых.
Мир Церкви, людем Твоим спасение даруй востанием Твоим.
Слава: О Троице Боже мой, Отче, Сыне и Душе, помилуй мир.
И ныне: Видети Твоего Сына Воскресение, Дево, сподоби Твоя рабы.
|
