Неделя о мытаре и фарисее

Неделя, в нюже чтется священное и святое Евангелие, притчи мытаря и фарисеа

На Утрени,

по шести псалмех, Бог Господь, на глас Осмогласника. И глаголем тропарь воскресен дважды: Богородичен единожды, и обычная стихословиа. Седальны Осмогласника. По Непорочных тропари: Ангельский собор: ипакои. Степенны и прокимен гласа: Всякое дыхание: Евангелие воскресно ряду. Воскресение Христово: псалом 50.

Слава, глас 8: Покаяния отверзи ми двери Жизнодавче, утренюет бо дух мой ко храму святому Твоему, храм носяй телесный весь осквернен: но яко щедр, очисти благоутробною Твоею милостию.

И ныне, Богородичен: На спасения стези настави мя Богородице, студными бо окалях душу грехми, и в лености все житие мое иждих: но Твоими молитвами избави мя от всякия нечистоты.

Таже, глас 6: Помилуй мя Боже, по велицей милости Твоей, и по множеству щедрот Твоих, очисти беззаконие мое.

Множества содеянных мною лютых, помышляя окаянный, трепещу страшнаго дне суднаго: но надеяся на милость благоутробия Твоего, яко Давид вопию Ти: помилуй мя Боже по велицей Твоей милости.

Канон воскресен Осмогласника, со ирмосом на 4, и крестовоскресный на два, и Богородицы на два: и в Триоди на 6. Творение Георгиа. Егоже краестрочие в Богородичнах: Георгиа, глас 6:

Песнь 1: Яко по суху пешешествовав Израиль:

Притчами вводяй вся Христос, к жития исправлению, мытаря возвышает от смирения, показав фарисеа возвышением смиряема.

От смирения честь высокотворящую, от возношения же падение видя лютое, мытаревым ревнуй добрым, и фарисейскую злобу возненавиждь.

От возношения испражняется всякое благое, от смирения же потребляется всякое злое: еже облобызаим вернии, гнушающеся яве образа тщеславнаго.

Смиренномудрым быти Своим учеником хотя всех Царь, наказуя учаше ревновати мытареву воздыханию и смирению.

Слава: Яко мытарь стеню, и рыданьми немолчными Господи, ныне прихожду Твоему благоутробию: ущедри и мене, смирением жизнь ныне препровождающа.

Богородичен: Разум, совет, чаяние, тело, душу и дух, Владычице, возлагаю к Тебе: лютых враг и напастей, и будущаго прещения избави, и спаси мя.

Катавасиа: Отверзу уста моя:

Песнь 3: Несть свят, якоже Ты:

От гноища убо страстей смиренный возношается, от высоты же добродетелей низпадает люте всяк высокосердый: егоже образа злобы убежим.

Тщеславие оттщетевает богатство правды, смирение же расточает страстей множество: еже подражающия ны, части покажи мытаревы Спасе.

Яко мытарь и мы биющеся в перси, умилением вопием: очисти Боже нас грешных, яко да сего приимем оставление.

К ревности приидем вернии, исправляюще кроткое, смирению соживуще в стенании сердца, плаче же и молитве, яко да имамы от Бога прощение.

Слава: Отринем вернии высокохвальную гордыню, возношение же лютое, и дмение мерзкое, и злейшее фарисеево Богу нелепое свирепство.

Богородичен: В Тебе едином прибежищи надеявся, да не отпаду добраго чаяния: но да улучу Твою помощь Чистая, всякаго вреда лютых избавляемый.

Седальны, глас 4.
Подобен: Скоро предвари:

Смирение вознесе одержимаго злыми, мытаря возстенавша, и еже очисти, к Зиждителю воззваша: возношение же низложи от правды окаяннаго фарисеа велеречующа. Темже поревнуим добрым, злых отступающе.

Слава: Смирение древле вознесе мытаря, плачем возопивша: очисти, и оправдися. Того подражаим вси, во глубину зол впадшии, возопиим Спасу из глубины сердца: согрешихом, очисти едине Человеколюбче.

И ныне, Богородичен: Скоро приими Владычице, моления наша, и сия принеси Твоему Сыну и Богу, Госпоже Всенепорочная: разреши обстояния к Тебе притекающих, сокруши козни, и низложи дерзость вооружающихся безбожно на рабы Твоя, Пречистая.

Песнь 4: Христос моя сила:

Изрядный показа путь возношения, смирение, Слово смирившееся даже и до зрака рабия: Егоже подражая всякий, возношается смиряяся.

Вознесеся праведник, и низпаде фарисей: во множестве же зол отягчаемый смирися, но вознесеся мытарь, ненадежно оправдаемый.

Нищеты ходатай, от богатства добродетелей, безумие явися: и богатство абие смирение оправдания от крайния нищеты, юже стяжим.

Предрекл еси Владыко, велемудрствующим противостати всячески, и смиренным благодать Твою подая Спасе, смирившимся ныне нам Твою благодать низпосли.

Слава: К Божественному возношению присно возводя нас Спас и Владыка, высокотворное показа смирение: ноги бо учеником Своима рукама обмы.

Богородичен: Яко Свет неприступный Дево рождшая, души моея тьму светительною зарею разжени, и к стезям спасения житие мое руководствуй.

Песнь 5: Божиим светом Твоим Блаже:

Фарисеевы добродетели потщимся подражати, и поревновати мытареву смирению, во обою ненавидяще безместное мнение, и пагубу падений.

Правды течение тщетное обличися, сопряг в нем фарисей мнение: абие же мытарь высокотворною добродетелию стяжа спутника, смирение.

Колесничник в добродетелех, мняшеся тещи фарисей: но пеший, паче лидийския колесницы текий, мытарь добре предвари, припряг щедроте смирение.

Мытареву притчу вси уразумевше умом, приидите поревнуим слезам, дух сокрушенный Богу приносяще, грехов ищуще оставления.

Слава: Возносливый и злобный, горделивый же и дерзый далече отринем разумнии фарисеев нрав, лютый велехвальный, яко да не обнажимся Божественныя благодати.

Богородичен: Жезл силы Благая, всем низпосли нам к Тебе прибегающим, обладати посреде всех враг подающи, и всякаго вреда изымающи.

Песнь 6: Житейское море:

Жития поприще мытарь вкупе и фарисей течаста: но ов убо высокоумием содержимь, срамне утону, ов же смирением спасеся.

Жития бедное преминующе мы течение, подражаим мытарево убо мудрование ревнительно: бежим же кичения мерзкаго фарисеа, и живи будем.

Нравом поревнуим Спаса Иисуса, и Его смирению, желающе непрестанное радости селение получити, во стране живущих водворяющеся.

Показал еси Владыко, Твоим учеником высокотворное смирение, лентием препоясан по чреслом, нозе умыл еси, и сему образу подражати повелел еси.

Слава: Житие проидоста фарисей добродетельми, и мытарь прегрешеньми. но ов убо от гордости умовредныя, отступи смирения: ов же возношается, смиренномудр явлься.

Богородичен: Нага простотою, нехитростною же жизнию создана, преступления лестию одея мя враг, и плоти дебельством: ныне же Твоим ходатайством Отроковице, спасаюся.

Кондак, глас 4.
Подобен: Явился еси днесь:

Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.

Вторый кондак, глас 3.
Подобен: Дева днесь:

Воздыхания принесем мытарская Господеви, и к Нему приступим грешнии яко Владыце: хощет бо спасения всех человеков, оставление подает всем кающимся. Нас бо ради воплотися, Бог сый Отцу собезначальный.

Икос: Сами себе братие вси смирим воздыханьми, рыданьми побием совесть: да в суде тогда вечном тамо явимся вернии, неповинни, получивше оставление. Тамо бо есть воистинну ослабление, еже видети там ныне умолим: тамо болезнь отбеже, печаль и из глубины воздыхания, во Едеме дивнем, егоже Христос Зиждитель, Бог сый Отцу собезначальный.

Предисловие вкратце синаксарей, рекше, собраний Ксанфопулана триодныя синаксари.

Никифора Каллиста Ксанфопула собрания на знаменитыя праздники Триоди, един кийждо от них винословствующая, како, и когда сие из начала бысть, и каковыя ради вины сице ныне имеются, и от святых и богоносных отец учинишася с некоторыми веденьми частными, начинающаяся от Мытаря и фарисеа, и кончащаяся даже до Всех святых.

Долженствует убо месячный синаксарий, на седмой песни прежде яко обычай читатися, потом же настоящий.

Речеши убо по оных чтениих сице:

Стихи на Триоди:

Зиждителю горних и дольних,

Трисвятую убо песнь от ангелов:

Трипеснец же и от человеков приими.

На мытаря и фарисеа:

Фарисейски кто живет, Церкви далече бывает:

Христос бо внутрь, о смиреннии, приемлемый.

В настоящий же день, с Богом и Триодь начинаем: юже убо мнози от святых и богоносных красотодетель наших отец, добре и яко достояше, от Святаго движими Духа, сложивше песносоделаша. Первый же всех сие умысли, три глаголю песни, во образ мню Святыя и Живоначальныя Троицы, великий творец Косма, в Великой и святой страстей Господа и Бога и Спаса нашего Иисуса Христа седмице, по именованию вкратце, коегождо дне краегранесьми умыслив песни. От негоже и прочии от отец, паче же иных, Феодор и Иосиф Студите, по ревности онаго, и прочим неделям [седмицам] святыя и великия Четыредесятницы счинивше, тех обители Студийстей первее предаша. Наипаче песни учинивше, и уставивше, и другая книзе, отонудуже и когда, от отец собравше и снискавше. И понеже убо первый дней Неделя заключает яко воскресна, первая сущи, и осмая, и конечная, изрядно соделающе второму дню, рекше, понедельнику, первую уставиша песнь. Абие же третиему дню, рекше, вторнику, песнь вторую. Четвертому, рекше, среде третию. Пятому четвертую, еже есть, четвертку. И шестому дню, рекше, пятку, пятую песнь. Шестую же субботе, яве убо и седмую, и прочия две, осмую и девятую, яже общно вси дни яко истиннейша имут. Якоже убо божественный Косма, в Велицей Субботе положи четверопеснец, тамо сотворив: аще и послежде премудрейший царь Лев, повелев в совершение канон епископом Идрунским, монаха Марка, содела. Потребовательне же, Триодь именуется, ни бо присно трипеснец имать: ибо всесовершенна правила предлагает. Но мню от множайшаго именование прияти: или еже великия ради седмицы, якоже речено бысть прежде бывша. Мысль убо святым нашим отцем, книгою Триодию всею, вкратце все елико о нас Божия благодеяния изначала воспомянути, и на воспоминание всем изложити: како от Него создани быхом, и от пищи райския изгнахомся, и данную нам ко обучению заповедь отвергше, и отвержени быхом завистию первозлобника змия и врага, низложеннаго за гордость. И како пребывахом отвержени от благих, и от диавола водими. Како же Сын и Слово Божие милосердием Своим пострадав, преклонив небеса сниде, и в Деву вселися, и нас ради бысть Человек, и по Нему жительством на небеса восхождение показа, рекше, смирением предводительно и постом и отвержением злых, и прочими Его деянии. Како же пострада и воскресе, и на небеса взыде паки, и Духа Святаго низпосла святым Своим учеником, и апостолом, и како Сын Божий, и Бог совершенный, от сих всех проповедася. Что же паки божественнии апостоли, благодатию Пресвятаго Духа содействоваша, яко от конец святых всех вкупе собраша проповедию, наполняюще вышний мир: еже и мысль бяше изначала Создавшему. Но в сих убо Триоди мысль, настоящия три праздники, мытаря и фарисеа, и блуднаго, и втораго пришествия, якоже некое предобучение и поущение святыми отцы умыслися. Якоже предустроитися, и готовым нам быти к духовным подвигом постов, от обычая скверное навыкновение оставльшим. И первее убо всех мытареву и фарисееву нам притчу предлагают, и предвозгласною седмицею именуют. Якоже бо к телесным бранем отходити хотящии, от воевод брани время преднавыкают, яко да оружия очистивше и угладивше, и другая вся добре устроивше, и всяко претыкание от среды сотворше, к подвигом усердно воспрятаются, и еже к потребе снабдят. Многажды же и прежде сражения, и словеса, и повести, и притчи себе приносят, и на ревность изощряюще онех души: леность же, и боязнь, и уныние, и другое аще что бедно, отгоняще. Тако и божественнии отцы предтрубят пощения последующее на демоны ополчение, яко бы душам нашим некую предвзятую страсть, и яд долгим соделанный временем очистити: еще же и еже не имуще от благих, потщавшеся стяжим, и яко подобно вооружившеся, тако готови к поста подвигом да пойдем. Понеже убо первое оружие к добродетели покаяние, и смирение: и паки преткновение к величайшему смирению, гордость и вышение: настоящую от Божественнаго Евангелиа достоверную притчу первую всех излагают. Фарисеем убо гордости и дмения отложити нам страсть поущающе: мытарем же паки сопротивное страсти сея, смирение и покаяние противу сотворити. Понеже бо первая и горшая страсть гордыня и дмение яко теми с небесе падение диаволу бысть еже прежде убо Деннице, сих же ради тьме бывшу, и глаголему. Но и родоначальнику Адаму сих ради от пищи изгнание. Поущают сими, образом неким святии о своих исправлениих никомуже выситися, и на ближняго востаяти, но присно смиренну быти: Господь бо гордым сопротивляется, смиренным же дает благодать: лучше бо есть согрешающему обращатися, нежели исправляющемуся выситися. Глаголю бо, рече, вам: яко сниде мытарь оправдан паче, нежели фарисей. Объявляет убо притча, ниединомуже выситися, аще и благая деяй есть: но присно смирятися, и молитися от души Богу, аще и в последняя злая впадет, яко не далече спасения есть. Мытарь убо есть, иже дани от князей емляй, и за крайнюю неправду купуяй и приобретаяй отсюду. Фарисей же якоже отсечен кто негли, и прочих преимеяй разумом. Саддукей же от Саддоика некоего, еже есть праведен: седек бо правда. Три же бяху у еврей ереси: ессеи, фарисеи и саддукеи, иже ниже воскресению, ниже ангелу, ниже духу быти приемляху. Святых всех песноделателей Твоих молитвами, Христе Боже наш, помилуй нас, аминь.

Песнь 7: Росодательну убо пещь:

Оправдания делы возвышаемый, сетьми тщеславия люте превознесеся фарисей, безмерно хваляся: мытарь же легким крилом смирения вознесся, Богу приближися.

Смирения аки лествицею употребився образом мытарь, к небесней высоте возвысися: гордынею же гнилою и безумием окаянный вознесся фарисей, сниде до ада преисподняго.

Праведных ловя убо лукавый, образми тщеславия крадет: грешных же сетьми отчаяния связует. Но убо от обоих зол мытаря ревнителие, избавитися потщимся.

Молитвою Богу нашему припадем, слезами и теплыми воздыхании, подражающе мытарево высокотворное смирение, поюще вернии: благословен еси Боже отец наших.

Слава: Наказуяй ученики предглаголал еси Владыко, не мудрствовати высокая, совводитися же смиренным уча Спасе. Темже зовем Тебе вернии: благословен еси Боже отец наших.

И ныне, Богородичен: Иаковлю Тя доброту, и Божественную лествицу, от долу юже виде первее, простертую к высоте, вемы Чистая, низводящую свыше Бога воплощенна, и земныя паки возводящую.

Песнь 8: Из пламене преподобным:

Смиренномудренным нравом милостива Господа мытарь воздохнув обрете, и спасен бысть: образом же лютым языка велеречиваго, правды отпаде фарисей.

Фарисеева кичения произволения, и именования чистоты, бежим вернии: ревнующе мытареву добре помилованному смирению и нраву.

Гласы мытаревы вернии вещаим в церкви святей: Боже очисти, да с ним улучим прощение, пагубы велехвальнаго избавльшеся фарисеа.

Воздыханию мытареву вси поревнуим, и Богу беседующе, теплыми слезами возопиим Ему: Человеколюбче, согрешихом, благоутробне Щедрый, очисти и спаси.

Благословим Отца, и Сына, и Святаго Духа, Господа.

Стенанием мытаревым Бог преклонися, оправдив же сего, всем показа преклонятися присно, воздыханьми же и слезами, прегрешений просяще разрешение.

И ныне, Богородичен: Не вем паче Тебе иного заступления, Тя предлагаю молитвенницу, Чистая Всенепорочная. Тя ко из Тебе рожденному ходатаицу движу: всех оскорбляющих мя свободна покажи.

Песнь 9: Бога человеком:

Путь возношения смирение, от Христа вземше спасения образ, мытареву обычаю поревнуим, кичение возношения далече отметающе, нравом же смиренномудрия Бога умоляюще.

Душевную гордыню отвержим, нрав правый смиренномудрия стяжим, себе оправдати не тщимся, тщеславия кичение возненавидим, и с мытарем Бога умолим.

Молитвы Содетелю милости принесем мытарския, фарисейских отвращающеся неблагодарных молитв, и велехвальных гласов, иже на ближняго суд возводят, да Бога милостива и свет привлечем.

Многим прегрешений собранием отягчен, изобилием злобы мытаря преидох, и фарисеево велехвальное кичение притяжах, отвсюду пуст всех быв благих: Господи, пощади мя.

Твоего сподоби блаженства, Тебе ради духом нищих сущих: учением бо Твоего повеления, дух сокрушенный Тебе приносим, Спасе прием, спаси Тебе служащия.

Слава: Богу мытарь некогда помоливыйся, в церковь верне вшед, оправдася: воздыханьми бо и слезами пришед, сокрушением же сердца: все отложи грехов бремя очищеньми.

И ныне, Богородичен: Пети, славити, и блажити Тя давай нам, достойно чтущим Тя Пречистая, и Рождество Твое величающим, едина благословенная: Ты бо еси похвала христианом, и к Богу молитвенница благоприятная.

Ексапостиларий воскресный. Таже Триоди.
Подобен: Со ученики взыдем:

Слава: Высокоречия убежим фарисеева злейшаго, смирению же навыкнем мытареву изряднейшему, да вознесемся вопиюще к Богу со онем: очисти рабы Твоя, родивыйся от Девы Христе Спасе волею, и Крест претерпевый, совоздвигнувый мир Твоим Божественным могутством.

И ныне, Богородичен, подобен: Творец создания, и Бог всех, плоть человеческую прият из непорочныя утробы Твоея, Всепетая Богородице: и тленное мое естество все обнови, паки якоже прежде рождества оставль по рождестве. Отонудуже Тя верою вси восхваляюще зовем: радуйся миру славо.

На хвалитех стихиры воскресны Осмогласника, 4.
И Триоди самогласны 4: Не помолимся фарисейски братие: Фарисей тщеславием: Писаны на Вечерни.

Стих: Воскресни Господи Боже мой, да вознесется рука Твоя, не забуди убогих Твоих до конца.

Глас 3: Мытаря и фарисеа различие разумевши душе моя, онаго убо возненавиждь гордынный глас: оваго же ревнуй благоумиленной молитве, и возопий: Боже, очисти мя грешнаго, и помилуй мя.

Стих: Исповемся Тебе Господи, всем сердцем моим, повем вся чудеса Твоя.

Фарисеа велехвальный глас, вернии возненавидевше, мытаревой же благоумиленной молитве поревновавше, не высокая мудрствуем, но себе смиряюще со умилением воззовем: Боже, очисти грехи наша.

Слава, глас 8: От дел похваленьми, фарисеа оправдающа себе осудил еси Господи, и мытаря смирившася, и воздыханьми очищения просяща оправдал еси: не внимаеши бо велемудренным помыслом, и сокрушенная сердца не уничижаеши. Темже и мы Тебе припадаем во смирении, пострадавшему нас ради: подаждь оставление и велию милость.

И ныне: Преблагословенна еси Богородице Дево:

Славословие великое и отпуст. И обычно литиа в притворе, в нейже поем: Слава, и ныне: стихиру утреннюю евангельскую. И час первый.

Подобает ведати, яко стихиры вся 11 утренния евангельския, от сея настоящия Недели, и даже до Всех святых, на литиах утренних поются в притворе, на Слава, и ныне. Вестно же буди, яко от сея Недели начинаем чести в притворе, по отпусте литии, оглашения святаго отца нашего Феодора Студита. И аще тамо есть игумен, чтутся от него: аще же ни, то от екклисиарха, стоящим, и со вниманием послушающим братиям. По скончании же чтения глаголем тропарь преподобному Феодору, глас 8: Православия наставниче: без Богородична. И совершенный отпуст.